រដ្ឋបាលរាជធានីភ្នំពេញ បានសម្រេចផ្អាកសកម្មភាព និងអាជីវកម្មដែលមានហានិភ័យខ្ពស់ដូចជា រោងភាពយន្ដ, ខារ៉ាអូខេ, រង្គសាល, ឌីស្កូតែក, និងអាជីវកម្មក្លឹបកម្សាន្ដគ្រប់ប្រភេទ រយៈពេល ១៤ ថ្ងៃបន្ថែមទៀត ដើម្បីទប់ស្កាត់ការឆ្លងរាលដាលនៃជំងឺកូវីដ១៩។ នេះបើយោងតាមសេចក្ដីសម្រេចរបស់រដ្ឋបាលរាជធានីភ្នំពេញនៅថ្ងៃទី១៤ ខែតុលា ឆ្នាំ២០២១។




តាមការបញ្ជាក់ក្នុងសេចក្ដីសម្រេច វិធានការនេះ នឹងត្រូវចាប់អនុវត្ដពីថ្ងៃទី១៥ ដល់ថ្ងៃទី២៨ ខែតុលា ឆ្នាំ២០២១។ ហើយនៅក្នុងអំឡុងពេលនៃការដាក់ចេញវិធានការនេះ ក៏ត្រូវបានផ្អាកការជួបជុំប្រមូលផ្ដុំមនុស្សច្រើនជាខក្ខណៈឯកជនដែលមានមនុស្សចាប់ពី ៥០ នាក់ឡើងទៅផងដែរ​ ប៉ុន្ដែក៏មានករណីលើកលែងមួយចំនួន ដូចជាពិធីបុណ្យសព្វ ពិធីសាសនា និងពិធពីប្រពៃណីផ្សេងៗផងដែរ។
ដូច្នេះសង្ឃឹមថា ម្ចាស់អាជីវកម្មដែលត្រូវបន្ដផ្អាកនេះ ចូលរួមអនុវត្ដតាមសម្រេចសម្រេចរបស់រដ្ឋបាលរាជធានីភ្នំពេញ។
សូមជម្រាបផងដែរថា គិតត្រឹមថ្ងៃទី១៤ ខែតុលា ឆ្នាំ២០២១ នេះ ចំនួនអ្នកឆ្លងជំងឺកូវីដ១៩ នៅទូទាំងប្រទេសកម្ពុជាបានកើនឡើងដល់ ១១៥,៨៧៥ នាក់ អ្នកជំងឺព្យាបាលជាសះស្បើយសរុបចំនួន ១០៩,៦៥៥ នាក់ និងអ្នកជំងឺស្លាប់បាត់បង់ជីវិតកើនឡើងដល់ ២,៥៨៤ នាក់ផងដែរ។